Kryeministri në detyrë, Avdullah Hoti ka takuar sot ministrin në detyrë të Shëndetësisë, Armend Zemaj, drejtorin e IKSHPK-së, Naser Ramadani, drejtorin e SHSKUK-së, Valbon Krasniqi dhe zëvendësministrin e Arsimit Xhavit Rexhaj.

Shefi i qeverisë ka bërë të ditur se masat mund të ndryshojnë  edhe për shkollat ku nga e hënë mund të vazhdojë mësimi online, shkruan Arbresh.info.

“Është vendosur që të mbesin në fuqi masat e njëjta kundër Covid-19, pasi që është vlerësuar se trendet janë stabile. Ndërkohë që po shqyrtohen mundësitë për fillimin e mësimit online në të gjitha nivelet e arsimit, për dy javët e ardhshme, duke filluar nga 22 marsi”, thuhet në reagimin e Hotit.

Ky është njoftimi i plotë për të gjitha masat që po diskutohen.

Është vendosur që të mbesin në fuqi masat e njëjta kundër Covid-19, pasi që është vlerësuar se trendet janë stabile. Ndërkohë që po shqyrtohen mundësitë për fillimin e mësimit online në të gjitha nivelet e arsimit, për dy javët e ardhshme, duke filluar nga 22 marsi.

Vendimi lidhur me këtë çështje pritet të merret sot pasdite pas takimit të përbashkët të MASH-it, MSH-së, IKSHPK-së, SBASHK-ut dhe Këshillit të Prindërve.

Edhe në këtë takim, qytetarëve u kërkohet që të respektojnë distancën fizike, të përdorin maskat dhe të mirëmbajnë higjienën personale.  Ndërsa nga institucionet përgjegjëse për kontrollin e zbatimit të masave kundër Covid -19, që të ngritin nivelin e angazhimit përmes respektimit rigoroz të masave në fuqi.

Përkundër ngarkesave, institucionet shëndetësore po funksionojnë me kapacitete të plota dhe furnizimi me barna është stabil. Ndërsa Komiteti për Imunizim dhe institucionet përkatëse janë duke i kryer të gjitha përgatitjet e nevojshme që sapo të arrijë kontingjenti i parë i vaksinës COVAX, menjëherë të fillojë vaksinimi i qytetarëve.